O Concello de Boiro participou na asemblea xeral do Fondo Galego de Cooperación

O Concello de Boiro participou na mañá deste martes 30 de xuño na asemblea xeral do Fondo Galego de Cooperación e Solidariedade. Na sesión abordáronse as iniciativas que se van desenvolver para minimizar o risco sanitario derivado da COVID19. Os asistentes, entre eles o persoal do departamento de Servizos Sociais de Boiro, aprobaron as Liñas Estratéxicas 2020-2030 e o Plan de Actividades 2020 do devandito fondo. As iniciativas incluídas son froito dun intenso traballo previo de actualización, aliñando o programa ao novo contexto xerado pola pandemia, tanto para as accións previstas para as nosas catro provincias como para as que poñen o foco nos países do sur.

Segundo informou o Concello de Boiro, o devandito traduciuse, por exemplo, na cancelación de todas as actividades que implicasen viaxes internacionais e en intensificar a implementación da Axenda 2030 nas administracións locais con iniciativas como a elaboración de plans municipais.

O Fondo Galego de Cooperación e Solidariedade está integrado por 98 concellos, entre os que está o de Boiro e as deputacións de Pontevedra, A Coruña e Lugo.