O Bloque Nacionalista de Boiro vén de emitir un comunicado no que convida á veciñanza a apostar de cheo polo comercio do termo municipal, os establecementos de proximidade, que son, con diferenza, segundo advirte a agrupación, os que máis precisan o apoio da cidadanía e de cuxa “saúde” depende a recuperación económica e social dos concellos.
“Desde o BNG somos conscientes da importancia de mercar nos comercios de proximidade”, explica a agrupación, engadindo que incentivar os investimentos locais forma parte dos seus obxectivos base, cousa que se ten materializado en campañas de concienciación “nas que insistimos no que ten de positivo para a economía do noso pobo que as compras se fagan nos establecementos boirenses e, na medida do posíbel, consumo de produtos galegos”. O BNG lembra que este compromiso polo local debe estar máis vixente que nunca, coa “crise sanitaria pola que vimos de pasar”, unha situación que creou desemprego e que fixo que moitas persoas autónomas e pemes sufriran importantes perdas económicas.
O BNG de Boiro considera que “é necesario un chamamento para insistir na necesidade de que as compras se realicen no comercio de proximidade para que así, a economía reverta no noso pobo e consecuentemente, axudar a todos os sectores que viron minguada a súa economía durante a crise da COVID-19”.
