En termos xerais, a nosa comarca vén de saír ben parada ao abeiro da publicación da listaxe negra das praias nas que, con COVID ou non, non será posíbel bañarse. Nesta clasificación en negativo, figuran dous areais da nosa contorna, o de Peralto en Escarabote (Boiro) e o de Testal en Noia.
A información veu dada os días pasados polo SERGAS, a raíz dos seus estudos periódicos sobre a calidade das augas e ríos da nosa costa. Este ano, logo de cinco tempadas consecutivas ofrecendo unha calidade insuficiente, foi prohibido o baño, de xeito permanente, en 15 praias marítimas. Na listaxe están, como dixemos, Testal e Peralto, que, como os restantes espazos da costa galega, teñen presenza de bacterias, concretamente de microorganismos como Escherichia coli ou Enterococo intestinal en niveis non aceptábeis. A presenza deste tipo de bacterias débese ao fluxo constante de vertidos de augas residuais ou fecais procedentes da agricultura, a gandería ou a sistemas deficientes de saneamento.