Con motivo do Día Mundial do Medio Ambiente, este venres 5 de xuño, a eléctrica Naturgy vén de facer balance das intervencións a prol da diversidade realizadas pola compañía nos nosos concellos a prol da conservación da diversidade e os hábitos sustentábeis e respectuosos coa natureza: un total de 57 accións recentes na nosa terra, que supoñen o 20% da actividade green desenvolvida pola empresa en todo o mundo.
Entre estas actividades figuran accións tan significativas como por exemplo a creación do lago Meirama (en palabras de Naturgy “o primeiro lago artificial que permite o seu uso como reserva de auga para as persoas en Europa”) ou o proxecto para preservación da lamprea, este último desenvolvido en Noia, conxuntamente coa Asociación de Veciños Pedrado Castro, a Confraría de Pescadores e a Dirección Xeral de Conservación da Natureza da Xunta.
A iniciativa, que contou cun orzamento de 120.000 euros, busca activar accións directas que potencien a presenza da lamprea nas augas da nosa comarca. En concreto, permitiu inventariar, recuperar e pór en uso os rodeiros (estruturas de pedra tradicionais na pesca da lamprea) na contorna do val do río Tambre. Así mesmo, creouse un Centro de Interpretación da Lamprea nun edificio anexo á Central Hidroeléctrica do Tambre e unha ruta de sendeirismo para favorecer o seu coñecemento, conservación e posta en valor do patrimonio etnográfico vinculado á especie.
