Os servizos sanitarios de urxencia trasladaron a un home que resultou afectado cando actuaba contra un incendio declarado no seu taller de coches.
Ocorreu pasadas as once da noite pasada nas instalacións situadas na Rúa da Gavoteira, na Pobra do Caramiñal, tal e como informaron os axentes da Policía Local a través do 112 Galicia.
Debido a que se trata dunha zona con vivendas próximas, os mesmos axentes procederon ao desaloxo dos veciños, que puideron volver aos seus domicilios en canto os Bombeiros de Ribeira sufocaron o incendio e se garantían as condicións necesarias de seguridade.
Pola contra, o dono do local foi trasladado por un equipo de Urxencias Sanitarias de Galicia-061 ao Hospital do Barbanza a causa dos síntomas de intoxicación por inhalación de fume que presentaba. O home atopábase no interior do taller para tratar de deter o incendio, malia as advertencias dos axentes da Policía Local.
En canto aos danos provocados polo lume, cómpre sinalar que foron cuantiosos, pois resultaron afectados un 11 vehículos e unha moto. Tamén o teito e outras partes da estrutura do taller evidencian os efectos do incendio.
