Portos de Galicia presentou este primeiro de xuño diversos detalles sobre a nova guía náutica de Galicia, elaborada pola entidade autonómica e posta a disposición dos usuarios do sector, achegándolles información práctica sobre as instalacións e os servizos dos portos deportivos da nosa Comunidade, tanto de titularidade autonómica como estatal. A guía foi presentada este luns pola presidenta de Portos, Susana Lenguas, durante un encontro cos representantes das asociacións do sector. Ten feitura de plataforma dixital, xa dispoñíbel na Rede.
A publicación online está traducida a cinco idiomas (galego, castelán, inglés, francés e alemán), para facilitar a súa difusión no mercado internacional. Trátase, sinalou Lenguas, “dunha ferramenta de uso práctico para os navegantes que chegan a Galicia recompilando información útil de todos os peiraos deportivos da comunidade nun formato interactivo e moi gráfico para maior axilidade”. En concreto, permite aos usuarios planificar travesías en función da embarcación e a súa necesidade de servizos portuarios, e identifica todas as instalacións menores xestionadas directamente por Portos de Galicia destinadas ao atraque como porto base de embarcacións de recreo.
En total, recolle datos de 72 instalacións portuarias, 42 portos deportivos que admiten tránsitos e 30 instalacións menores. A guía náutica artella o litoral galego en catro costas: Rías Altas, Golfo Ártabro, Costa da Morte e Rías Baixas. Nas Rías Altas recóllense dous portos deportivos; no Golfo Ártabro 11; na Costa da Morte dous e as Rías Baixas, como contorna xeográfica de maior turismo costeiro, presentan 27 peiraos náutico recreativos.
De cada un destes portos a guía recolle cartas náuticas, coordenadas, número de amarres, esloras e calados, servizos dispoñíbeis, certificacións de calidade e información de contacto, entre outros datos.
