O Servizo Galego de Saúde investigou a máis de cen persoas relacionadas co foco da COVID-19 detectado a pasada fin de semana no Barbanza, que se mantén con nove positivos. Segundo o Sergas realizaron 104 PCR, das cales 94 foron negativas e unha está pendente “de coñecer o resultado”.
As nove persoas con PCR positiva atópanse en illamento e seguimento domiciliario, mentres que as outras 95 investigadas permanecen en corentena catorce días.
Neste día de San Xoán a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 331, deles 108 son da área da Coruña, 17 da de Lugo, 21 da de Ourense, 8 da de Pontevedra, 135 da área de Vigo, 31 da de Santiago, e 11 da de Ferrol. Do total de pacientes positivos, 4 están en unidades de hospitalización e 327 no domicilio. Non hai pacientes positivos en UCI. Polo de agora, en Galicia hai un total de 10.554 persoas curadas, rexistrándose 619 falecementos. O número de PCR realizadas é de 168.410.
Os casos de COVID-19 en residencias de maiores de Galicia seguen en cinco segundo os datos facilitados polas consellerías de Política Social e Sanidade.
