Clausurada a sétima edición de BarbantiArte, na que participaron 81 artistas

O Museo do Gravado de Artes acolleu este xoves 25 o acto de clausura da sétima edición da exposición BarbantiArte. O peche da mostra resultou ser un concorrido encontro arredor do talento local (aínda que con estritas limitacións de aforamento para garantir a seguridade sanitaria dos participantes), materializado este ano nas contribucións das/os 81 artistas participantes. O acto de clausura foi en certa maneira un acto de benvida, xa que, como lembraremos, a mostra non puido ter inauguración oficial ao abrirse en plena pandemia. De feito, o groso das visitas foron, cunha importante participación, visitas online.

O acto de peche contou coa participación do presidente da Fundación Museo de Artes e alcalde de Ribeira, Manuel Ruiz; do secretario xeral de Políticas Culturais da Xunta, Anxo Lorenzo; da vogal da Asociación Barbantia (entidade promotora desta proposta) Pilar Sampedro; do director do museo Pastor Rodríguez; e da concelleira de Cultura de Ribeira, María Sampedro.

Segundo salientaron, a exposición BarbantiaRte mostrou a arte que se fai no Barbanza nos nosos días, servindo de encontro entre creadores e creadoras da nosa zona, de diferentes idades e propostas: performance, óleo, gravado, fotografía, escultura, esmalte, vídeo-creación, etc.

“A exposición”, destacaron, “xuntou artistas consagrados e outros noveles, artistas con diversidade funcional de colectivos como AMBAR ou aqueles que aínda non sendo naturais da comarca, residen ou crean nesta zona”

A clausura concluíu cunha performance creativa a cargo de Esperanza Mara, que brindou a audiencia a creación dun monotipo en directo conxugada cun arrolo a capela.