Unha tras outra, van caendo as grandes celebracións da nosa comarca, pospoñéndose, reconstruíndose ou mesmo envorcándose nas redes para seguir vivas e á espera de tempos mellores. As Festas da Guadalupe 2020, segundo vén de informar a organización no seu Facebook (a Asociación Sociocultural A Moreniña), non serán tampouco unha excepción nesta tónica, e, polo tanto, quedan suspendidas por mor das complexidades da crise sanitaria e dos riscos que pode implicar, xa no mes de setembro, unha festa tan multitudinaria para a saúde da poboación.
“Non será unha sorpresa para vós este anuncio, pero temos que cancelar as festas porque descoñecemos cal vai ser a situación da pandemia da COVID-19 no mes de setembro, e se haberá rebrotes, e tamén porque non sabemos cales van ser as condicións que se impoñan para celebrar actividades ao aire libre, e non temos medios para evitar aglomeracións”, explican dende a organización, engadindo que tampouco existen razóns de peso para desenvolver actividades que non poida gozar todo o mundo por mor dos límites de aforamento. Ademais, engaden, “a situación económica do comercio local e da veciñanza non resulta a mellor como para pedir donativos para estas festas”. A organización pecha o comunicado facendo un convite xeral e urxente a apoiar aos comerciantes de Rianxo: “Pedímosvos que fagades un esforzo por paliar esta situación mercando no comercio local e consumindo na hostalería local”.
