Gonzalo Caballero, candidato socialista á Xunta de Galicia, visitou este martes 22 de xuño o concello de Boiro, onde estivo acompañado polo alcalde José Ramón Romero Martiño. Na súa estadía no concello barbanzán, Caballero celebrou co rexedor o primeiro aniversario do inicio do mandato en Boiro do PsdG-PSOE, un período que foi, nas súas palabras, “un ano de estabilidade, de modernización, de fortalecemento das políticas locais, de racionalización da administración e de aposta polo social”.
Caballero lembrou que se ben Martiño demostrou ao longo destes meses que é un rexedor “que pide polo seu Concello”, agora é a quenda, tamén, de estender esta estratexia ao nivel autonómico. O candidato á Xunta aproveitou a visita para facerse eco dunha das grandes demandas o actual equipo de Goberno de Boiro, que é a construción dunha residencia de maiores, un proxecto que Caballero se comprometeu a executar no caso de que consiga formar Executivo nos vindeiros comicios do 12 de xullo. “Aquí”, dixo, “hai unha necesidade dende hai moitos anos para que os maiores poidan vivir con dignidade, e o mellor xeito de construír a residencia é facelo dende un Goberno da xunta que cre no público que pode compromete a facer unha residencia pública”.
O candidato do PSdG recalcou a perfecta viabilidade do proxecto e recoñeceu que no caso do concello barbanzán, será unha das prioridades do “novo Goberno progresista que Galicia necesita”.