Malia que a crise sanitaria foi un duro revés para a celebración do Día das Letras Galegas, adicado este ano a Ricardo Carvalho Calero, é certo que os nosos concellos puxeron todo da súa parte para que a festa seguise nas redes e para que, en base a esta condición de celebracións online, obtivéramos un extra de accesibilidade e atemporalidade. Dito doutro xeito: a festa da nosa cultura seguiu todo o mes de maio e continuará nos meses seguintes. Este foi o plan, precisamente, do Concello de Boiro, que ofreceu unha completa axenda conmemorativa para todo maio: o ciclo online Cultura na Rede.
A campaña rematou formalmente este 31, co vídeo Escapada, de Teatro do Improvisto, pero segue viva para quen queira reproducir os audiovisuais en calquera intre.
Previamente foron chegando outros importantes vídeos conmemorativos, como por exemplo as celebracións da cultura galega e local de Diana Sieira, da Banda de Música de Boiro, de María Magán ou de Antón Riveiro Coello, entre outros representantes das artes, da literatura ou da música do concello (como, tamén, Fran Velo, Suso Santamaría ou Sonia Lebedynski).
Nos vídeos, as e os participantes fixeron unha presentación do seu traballo e explicaron o que representa para elas e eles o acto de crear ou impulsar a creatividade. Podemos acceder a estes vídeos conmemorativos da cultura no Facebook e máis no Twitter do Concello de Boiro.
