As pegadas aínda vixentes do franquismo centraron a presentación do novo ensaio de Manuel Monge no Centro Lustres Rivas

Esta quinta feira (xoves) celebrouse no Centro Cultural Lustres Rivas de Ribeira un acto que puxo de manifesto a necesidade de seguir traballando a prol da memoria histórica e de erradicar todo tipo de símbolos que, aínda a estas alturas e con todo o que se ten loitado, celebran a ditadura. Estamos a falar da presentación do ensaio Os restos do franquismo en Galiza, escrito por Manuel Monge González e editado por Laiovento. O autor da obra, presidente da Comisión pola Recuperación da Memoria Histórica da Coruña, sociólogo e ensaísta, compareceu no Lustres Rivas a carón do presidente da Asociación Altofalante, Óscar Sobrido, entidade organizadora do evento, felizmente activa de novo logo da obrigada paréntese derivada da emerxencia sanitaria.

Segundo Sobrido, decidiuse retomar a actividade coa memoria histórica porque sempre “foi un ámbito no que se ten traballo moito desde a creación da asociación no ano 2005”. Para Sobrido, aínda fica moito por facer para “poder erradicar todos os restos do franquismo en Galiza e render merecida homenaxe a quen loitou pola democracia”.

Polo que respecta á obra presentada, chegou ás librarías este mes de xuño e trátase dun ambicioso ensaio editado por Laiovento que conta coa colaboración da Fundación Galiza Sempre e dun completo feixe de investigadores e investigadoras, xornalistas, asociacións memorialistas, culturais e entidades de toda índole. O libro, de case 400 páxinas, abre fogo dende os seus inicios poñendo de manifesto que aínda quedan en Galiza sobre 600 símbolos franquistas en 87 concellos: rúas, retratos, placas, esculturas e todo tipo de distincións que exaltan, honran e distinguen golpistas, franquistas e criminais.