A Mancomunidade de Concellos de Arousa Norte é unha das entidades que vén de sumar forzas coa Deputación da Coruña e outros organismos e consorcios turísticos da provincia a prol da promoción dos xeodestinos coruñeses a través das máis avanzadas ferramentas de comunicación. As entidades mantiveron este luns 22 de xuño unha xuntanza para poñer en común as novas estratexias e avanzar nas liñas de comunicación conxunta para o devandito labor colectivo de promoción. A aposta pola calidade e seguridade ademais do turismo de proximidade e o avance na dixitalización son algúns dos eixos do novo horizonte do sector.
O Consorcio de Turismo da Coruña, a Asociación de empresarios de Camariñas, a Asociación Sociocultural Auga e Sal, Asociación da Comarca de Ortegal, INCOLSA, a Mancomunidade de Ferrol, a Mancomunidade Arousa Norte, a Sociedade Mixta de Ferrol, a Asociación de Empresarios Fisterra-Muxía, a Reserva da Biosfera As Mariñas –Betanzos, a Asociación de Concellos do Camiño Inglés, Ría da Estrela, CMAT e a Mancomunidade de Municipios de Ordes son algúns dos entes de xestión supramunicipal que forman parte desta aposta xeral e conxunta polo turismo de calidade e proximidade.
Na reunión, que puxo en común as estratexias destas entidades turísticas da provincia da Coruña, coincidiuse na importancia da seguridade e da calidade nos destinos, apostando por unha dixitalización da información turística, que complemente os formatos físicos. No ámbito da promoción, centráronse na captación dun turismo máis próximo para a tempada de verán ou na participación en feiras virtuais de ámbito internacional.
Un dos ámbitos nos que van traballar Deputación da Coruña e os entes de xestión é o da intelixencia turística. En concreto, desenvolverán, en colaboración coa Universidade da Coruña, estudos tecnolóxicos para analizar, coñecer e planificar con maior precisión o turismo no territorio.
Outro dos eixos centrais de actividade, ademais do traballo en rede entre os diferentes entes, é a mellora da comunicación e desenvolvemento turístico, así como a creación de novos produtos sustentábeis.
Na xuntanza debulláronse iniciativas avanzadas das entidades como por exemplo a dixitalización e adaptación e espazos como a creación dun autocinema no caso de Arousa Norte, que presentará a súa nova imaxe en breve; o turismo activo mediante rutas de sendeirismo e a potenciación do surf na Mancomunidade de Ferrol, a aposta polo mar e a natureza da Costa da Morte, as rutas do turismo industrial da Ría de Muros-Noia ou o destaque da artesanía do encaixe e un recurso como é o Cabo Vilán na Asociación de Camariñas. Gabinete de Prensa Deputación da Coruña.
