A Asociación Altofalante de Ribeira volve á actividade esta quinta feira (xoves 25 de xuño) cunha relevante cita de memoria histórica, trala paréntese obrigada da emerxencia sanitaria. A actividade de Altofalante retómase cun acto público que acollerá a presentación do ensaio Os restos do franquismo en Galiza, escrito por Manuel Monge González e editado por Laiovento. O autor da obra foi presidente da Comisión pola Recuperación da Memoria Histórica da Coruña, sociólogo e ensaísta.
Segundo o presidente da asociación, Óscar Sobrido, decidiuse retomar a actividade coa memoria histórica porque sempre “foi un ámbito no que se ten traballo moito desde a creación da asociación no ano 2005”. Para Sobrido, aínda fica moito por facer para “poder erradicar todos os restos do franquismo en Galiza e render merecida homenaxe a quen loitou pola democracia”.
O acto celebrarase no Centro Cultural Lustres Rivas de Ribeira ás 20:00h. Segundo informan desde Altofalante, seguirase un protocolo para garantir as medidas de prevención e seguridade sanitarias.
