Os colectivos e praias da nosa comarca pasan este luns á primeira liña de acción contra contaminación mariña, concretamente nos areais de Cabío e A Corna, entre Pobra e Palmeira. O motivo? A celebración este luns 8 de xuño do Día Mundial dos Océanos, que impulsa na nosa terra a organización ambiental galega ADEGA e faino, por mor das limitacións ás que obriga a actual situación de pandemia, cun formato reducido e controlado, pero igualmente relevante na súa mensaxe: cómpre coidar o sitio no que habitamos, polo noso ben e polo das xeracións que virán. Desta volta, a limpeza nas ditas praias será realizada por parte da equipa de Educación Ambiental de ADEGA, pois “ata o momento non se poden realizar actividades de voluntariado masivas nos espazos naturais”.
Para evitar riscos innecesarios, a equipa de ADEGA respectará todas as medidas sanitarias e de precaución oportunas, levando máscaras e luvas e mantendo sempre a distancia de seguridade interpersoal.
Coma todos os anos, o obxectivo desta xornada será o de “eliminar parte dos residuos que están nos areais así como facer unha chamada de atención sobre o lixo que acaba nos nosos areais e ecosistemas mariños”. ADEGA tamén aproveitará para comprobar se hai presenza da píllara das dunas nestes areais e cal está sendo a evolución das especies exóticas invasoras.
A maiores, a organización tirará partido da actividade para lanzar unha mensaxe clara contra os actuais modelos de produción: insustentábeis e mal xestionados en materia de residuos. “Todo iso fai que cada ano rematen nos océanos 10 millóns de toneladas de lixo”, explican, poñendo o foco na problemática engadida da actual situación de pandemia, con luvas e máscaras espalladas por todos os recantos das nosas cidades, vilas, aldeas e espazos naturais: “Desde ADEGA cústanos entender como, a sabendas dos riscos que comporta unha mala xestión destes residuos, sigan dándose este tipo de accións irresponsábeis, non xeneralizadas, pero preocupantes. Así pois, a problemática da contaminación mariña acada, se cabe, maior intensidade nestes tempos”.
