O San Xoán deste ano, como tantas outras cousas no medio deste contexto de pandemia aínda vixente, non será unha festa coma as dos demais anos. Para compensar a cancelación das actividades a pé de cacharela e co fin de reivindicar outros aspectos relevantes da conmemoración, os nosos concellos están a impulsar varias iniciativas nas redes. Por exemplo o Concello da Pobra do Caramiñal, que convocou no Facebook o concurso Fóra Meigallo, no que se convida ás veciñas e veciños a achegar expresións típicas de San Xoán.
O certame desenvolverase entre hoxe, venres 19, e mañá 20 de xuño. O obxectivo do certame é “pór en valor do medio natural que nos rodea en relación cos costumes tradicionais galegos relativos a esta data”, ou sexa, a importancia das plantas, rituais e expresións orais que van ligadas ao San Xoán da Pobra do Caramiñal.
Será, en definitiva, unha boa oportunidade de enxalzar “a gran sabedoría ambiental, cultural e lingüística das nosas persoas maiores, auténtica memoria viva”.
O concurso está aberto a toda a cidadanía. Os requisitos son os seguintes:
· Achegar expresións verbais (ditos, refráns, costumes, combinacións de herbas) relacionadas co San Xoán, sen fotografías.
· As expresións que se escriban fóra do Facebook do Medio Ambiente da Pobra ou fóra do prazo non concursarán.
· As expresións que non se escriban en galego non concursarán.
