Finalmente os espazos públicos das nosas cidades e vilas volven atoparse cos libros, tras longas semanas de incógnitas sobre a posibilidade (ou non) de que tivese continuidade este verán o programa das Feiras do Libro de Galicia, debido á complexa situación sanitaria polo que estamos a pasar. En Santiago véñense de despexar dúbidas ao respecto, coa apertura da 39 edición da Feira do Libro de Compostela, organizada pola Federación de Librarías de Galicia coa colaboración de entidades como a Consellería de Cultura.
A celebración desta importante cita cultural en Santiago, que terá as portas abertas até o 21 de xuño dando acubillo a preto de 40 encontros con escritoras e escritores (con sinaturas de libros incluídas, seguindo estritas normas de seguridade sanitaria), é a antesala do acostumado periplo das feiras por diversas localidades da nosa terra, incluída a vila de Rianxo.
Nesta feira terán presenza cun espazo propio as librarías Pedreira, Cortizas, Numax, Ler Librarías e A Gata Tola, así como Alvarellos Editorial.
As feiras do libro de Galicia recalarán tamén até o próximo mes de outubro en vilas e cidades como Vigo, Ponteareas, Redondela, Rianxo (do 23 ao 26 de xullo), A Coruña, Foz, Monforte de Lemos e Ourense.
