Coa volta progresiva á “nova normalidade” están a regresar actividades que a cidadanía en xeral botaba moito en falta, por exemplo a celebración dos mercadiños ambulantes nos concellos, que foron, son e serán puntos cruciais para o aprovisionamento de produtos de calidade. O mercadiño da Pobra volve este 13 de maio e, de aquí adiante, todos os mércores e no seu lugar habitual.
Iso si, segundo nos lembra o Concello, tanto os comerciantes como a cidadanía terán que respectar unha serie de medidas imprescindíbeis de seguridade, entre as que destaca a necesidade de gardar unha mínima distancia de seguridade. Neste senso, os puntos de venda están obrigados a establecer dous metros de separacións entre uns e outros, amais de aplicar outras medidas de hixiene “para favorecer as compras dos consumidores e consumidoras coa máxima seguranza”.
O mercado semanal, que será de momento soamente agroalimentario, contará con postos de alimentación, froitas, verduras, hortalizas, legumes e tamén de plantas, sementes e flores. Dende o Concello da Pobra do Caramiñal aproveitaron o recordatorio do inicio da actividade para facer un chamamento “á responsabilidade da veciñanza para o podermos levar a cabo coa maior seguridade posíbel”.
