A agrupación cidadá SumaRibeira, a través do seu portavoz Xurxo Ferrón, vén de emitir un comunicado no que mostra a súa inquietude ante a situación sanitaria que dende hai uns días padece a veciñanza das parroquias de Corrubedo e Palmeira, onde, segundo apuntan, existen deficiencias no seu servizo de atención primaria.
“No medio desta crise sanitaria sen procedentes”, explican, “vemos con perplexidade como estas parroquias están actualmente sen a imprescindíbel atención primaria”, tras verse privadas do servizo médico para as consultas presencias, “se ben”, indican, “na parroquia de Corrubedo e debido ás protestas da veciñanza conseguiron dispor dun médico a tempo parcial, tempo que consideramos totalmente insuficiente para unha atención primaria de calidade”.
SumaRibeira sostén que aínda é máis grave o caso de Palmeira e o seu centro de saúde, onde “non hai neste momento ningún facultativo/a para atención presencial aos pacientes”, achegándose só a posibilidade de recibila por vía telefónica, o que obriga á veciñanza, moita dela xente maior, a acudir ao centro de saúde de Ribeira, “saturándoo”.
Dende a agrupación esixen que “sexa restituído o devandito servizo nas dúas parroquias que, agora aínda con máis necesidade debe estar e preto da cidadanía xa que se trata dun servizo vital”. E engaden: “Instamos ao Concello de Ribeira a que faga as xestións necesarias ante as institucións competentes para que o servizo de atención primaria presencial sexa restablecido nestas dúas parroquias, a tempo total, de forma urxente”.
