O portavoz da Plataforma Stop Deshaucios Barbanza, José Manuel Pena, vén de remitir unha queixa aos responsábeis das entidades financeiras Abanca e Banco Santander polos problemas de atención aos usuarios que se están a xerar estes días nas oficinas das dúas entidades nos concellos da nosa comarca, onde se están a formar longas ringleiras de veciñas e veciños que acoden para realizar as súas xestións e teñen que agardar moito máis tempo do debido para poder realizalas debido, segundo explica a plataforma, á existencia de sucursais pechadas por mor dos ERTES.
A entidade que coordina José Manuel Pena lembra no escrito enviado ás devanditas entidades que “estamos mergullados nunha situación de Estado de Alarma como consecuencia dunha emerxencia sanitaria” e que “a maioría das persoas que acoden ás sucursais son persoas maiores, de risco, e con patoloxías previas”, o que guinda un panorama de inseguridade para as mesmas e para o resto dos cidadáns.
En palabras da plataforma, as entidades financeiras terían “que adoptar as medias oportunas ao obxecto de aumentar o persoal de atención ao público, abrir as oficinas ou ben conceder a correspondente cita previa para a atención pero non seguir con esa lamentable e perigosa situación”.
Por outra banda, Stop Deshaucios Barbanza tamén aproveitou para agradecer o labor despregado polo Departamento de Servizos Sociais do Concello de Ribeira así como da ONG Cáritas “pola rápida actuación para atender a un veciño da localidade que levaba varias semanas durmindo na rúa e que foi reacollido”. A entidade humanitaria salientou que neste caso se están a seguir polo miúdo os protocolos, subministrándolle á dita persoa todo tipo de axuda e en especial para poder seguir un programa de desintoxicación.
