Coa entrada dos nosos concellos na fase II da desescalada houbo unha serie de boas novas en materia cultural, por exemplo a reapertura máis ampliada das nosas bibliotecas municipais, logo da activación os pasados días do servizo de préstamo con cita previa. Este 25 de maio a Biblioteca de Ribeira comunicou á veciñanza a operatividade da súa sala de lectura, sen dúbida unha importante novidade para permitir que as seareiras e os seareiros dos libros se dean aproximado un chisco máis aos fondos da sala, logo de meses sen poder usar o servizo.
Iso si, a Biblioteca advirte que as medidas de seguridade, saúde e hixiene seguen perfectamente vixentes, e que para o uso da dita sala será de obriga empregar máscara e manter a distancia de seguridade con outras persoas, alén doutras normas básicas sanitarias (como por exemplo o aforamento máximo de 15 persoas por día, sendo prioritarias aquelas consultas feitas previamente por teléfono, no 981 835 650 ou no correo ribeira.rbgalicia@eidolocal.es).
A sala de lectura terá un horario de 9 a 14 horas, e quedan excluídos o servizo de lectura de prensa e máis os computadores de uso público.
