Este martes, 5 de maio, proseguirá na Coruña a repartición das máscaras enviadas a Galicia para a protección da poboación. Do total de 835.500 máscaras destinadas á comunidade galega, 344.000 distribuiranse esta semana na provincia coruñesa. A repartición realizarase nas principais cidades da provincia, como A Coruña, Santiago, Ferrol, Ribeira e comarca, Noia e contorna, áreas metropolitanas da Coruña, Santiago e Ferrol, e Carballo e Costa da Morte, con especial incidencia naqueles puntos de gran afluencia de persoas, como estacións de autobuses, estacións de trens, paradas de buses urbanos e interurbanos e paradas de taxis. A distribución contará coa participación de axentes da Policía Nacional, Policía Local, Policía Nacional Adscrita, Garda Civil e voluntarios de Protección Civil, entre as 7 e as 9 horas.
