O Concello de Boiro traballa no acondicionamento do edificio das Colonias como sede de entidades deportivas

O Concello de Boiro está a traballar no acondicionamento interior e exterior do edificio das Colonias de Praia Xardín, que se vai integrar no paseo marítimo e vai acoller a diversas entidades deportivas do municipio e tamén ao persoal do departamento de deportes. O alcalde, José Ramón Romero, o concelleiro de Obras, Luís Ruiz, e o concelleiro de Deportes, Marcos Fajardo, visitaron onte o edificio para ver a evolución das obras.
O inmoble, do ano 1955, foi construído como albergue de vacacións de
verán para nenos e nenas das escolas públicas de Santiago. O edificio pasou a titularidade municipal nos anos 80 e tivo diversos usos. Foi escola pública,
acolleu a sede da administración local mentres a casa do concello estaba en
reformas, nel estivo tamén a Policía Local e o xulgado de paz. Xa nos anos 90 se transformou como centro para cursos de formación e tamén sede de
Protección Civil.
Desde o ano 2011, o inmoble estivo sendo usado como almacén e foi a
comezos de 2020 cando se comezaron as reformas e o acondicionamento do
edificio das Colonias de Praia Xardín para acoller ao departamento de deportes e despachos para entidades deportivas do municipio, co obxectivo de aumentar as sinerxias entre a administracións e as entidades e clubs. O edificio vai contar tamén cunha sala de xuntas e reunións de uso común e estancias para o almacenamento de material das entidades deportivas, así como despachos individuais que funcionen como sede.
Os operarios municipais están traballando tamén no acondicionamento
exterior do espazo, para que o edificio quede integrado no paseo marítimo. O exterior vai contar con beirarrúa e zonas axardiñadas, así como con carril bici, que se vai ampliar e vai continuar por a parte de atrás do inmoble e tamén se vai acondicionar o espazo con prazas de aparcamento.
A primeira planta está xa lista e agora os traballadores ultiman os
traballos na planta baixa e no exterior. A previsión é que as distintas estancias do edificio estean listas este verán e poder facer xa o traslado do persoal de deportes para o novo despacho e que as entidades deportivas poidan facer xa uso das instalacións.

Colonias Boiro