Boiro pon a punto todas as súas praias para a tempada estival

O Concello de Boiro vén de facer balance dos traballos que está a desenvolver para acadar o óptimo acondicionamento das praias de cara á tempada estival que comeza progresivamente por mor da desescalada. Os traballos, segundo informa o Goberno local, estanse a realizar en todos os areais do termo municipal, con tarefas de limpeza e roce, así como con traballos de xestión orientados a garantir a seguridade sanitaria. Neste punto, e á espera de que as restricións medidas de control de aforamento se vaian establecendo, a Policía Local adícase a verificar que non se fagan aglomeracións na praia, asegurando que os bañistas gardan a distancia de seguridade. Amais, estanse a colocar en todos os areais contedores para a recollida selectiva de residuos.

Condicións de calidade excelente

Segundo engade o Concello, as praias de Boiro están en condicións para o baño, “xa que as analíticas que se fan cada ano por Sanidade revelan que as augas do municipio son de calidade excelente”. No termo municipal estas análises fanse nas praias de Barraña, Barraña-Saltiño, Carragueiros, Ladeira do Chazo, Mañóns, Piñeirón, Portomouro, Retorta e Ribeira Grande.

O Concello está traballando tamén no espazo de autocaravanas de Praia Xardín e Mañóns. A previsión é que abra na segunda quincena do mes de xuño, pero cunha serie de restricións de aforamento para “poder garantir as medidas de seguridade e distancia social”. Neste punto, iniciáronse as tarefas de roce e acondicionamento nos dito aparcadoiros de lecer.