A Consellería de Infraestruturas e Mobilidade, a través de Augas de Galicia, está a desenvolver estes días unha serie de traballos de acondicionamento, conservación e limpeza no treito interurbano do río Sanchanás (tamén coñecido como río Artes) ao seu paso polo concello de Ribeira. Os traballos lévanse a a cabo nun tramo de 4 quilómetros de lonxitude entre os lugares das Barcias e A Ponte, nas parroquias de Oleiros e Artes.
Segundo informa a Xunta, as principais tarefas consisten na retirada de árbores caídas e madeira morta na canle. Estas accións enmárcanse no programa de mantemento, conservación e mellora que realiza Augas de Galicia no dominio público hidráulico das bacías de Galicia-Costa, no ámbito territorial da zona Galicia-Centro.