A aula CeMIT do Concello de Boiro segue coa súa actividade de formación por vídeo-conferencia, contrarrestando con contidos a distancia a imposibilidade de organizar obradoiros presenciais. O vindeiro curso que se vai impartir dende o centro local de alfabetización dixital será unha acción formativa sobre Inkscape de nivel básico, mostrando o funcionamento e posibilidades deste programa de debuxo multiplataforma de código aberto. A actividade vaise desenvolver os días 13, 15, 18 e 20 de maio en horario de 11.00 a 11.50 horas.
Contidos adaptados á situación actual
O Concello de Boiro está a traballar por adaptar os seus contidos á situación actual producida pola COVID-19 e, nesta liña, a aula CeMIT de Boiro afronta esta primavera cunha completa programación online para continuar coa formación mediante vídeo-conferencia. A finais do mes de abril comezou o curso de Arduino e, esta semana, o de Opencart. Na segunda quincena do mes de maio vaise impartir o de Inkscape nivel básico. Os usuarios van aprender a dar os primeiros pasos con este programa para aprender a deseñar os seus propios logotipos.
As inscricións están abertas e poden facerse directamente na aula CeMIT de Boiro mediante correo electrónico, axentetic@boiro.org, ou por teléfono, 981 84 26 35.
