Efectivos da Garda Civil procederon durante estes días á repartición de máscaras de protección entre o tecido laboral e social dos polígonos industriais de “Suelo Empresarial del Atlántico” na provincia da Coruña, coa colaboración da Delegación e a Subdelegación do Goberno.
A xerente de Suelo Empresarial del Atlántico, Beatriz Sestayo, solicitou á Subdelegación a inclusión na repartición de máscaras dos polígonos que xestiona a entidade, para garantir a protección dos traballadores que acoden aos seus postos de traballo, en polígonos nos que se mantén unha importante actividade, debido á natureza das empresas que operan neles.
Beatriz Sestayo transmitiu o seu agradecemento pola resposta recibida tanto á Subdelegación, pola entrega dun milleiro de máscaras hixiénicas, como aos efectivos da Garda Civil polo seu esforzo pola seguridade dos traballadores e os cidadáns.
A repartición realizouse en función da actividade de cada polígono: 200 na Pobra (18 empresas instaladas), 200 na Laracha (15 empresas), 150 en Vimianzo (7 empresas), 150 en Rianxo (15 empresas activas), 150 en Muros (12 empresas activas) e 150 en Cee (7 empresas).
