O Ministerio de Sanidade publicou esta mañá no BOE a orde que regula os desprazamentos dos nenos durante o estado de alarma, que entrará en vigor mañá domingo. O texto sinala que os “menores de 14 anos” poderán pasear acompañados dun dos seus proxenitores, titor legal ou “empregado do fogar a cargo do menor”. Este último deberá contar cunha autorización escrita dos pais.
Tal e como sinala o texto, non é indispensable que o coidador conviva no fogar do menor. Sobre a idade dos nenos que agora poderán saír a pasear houbo certa confusión na última semana: mentres o ministro de Sanidade, Salvador Illa, sempre falou de “menores de 14 anos”, o vicepresidente Pablo Iglesias referiuse a menores “de ata 14 anos”. Ata a publicación da orde este sábado non quedou claro onde se establecía a barreira: os de 14 súmanse ao grupo de menores que poderán saír pola súa conta nas mesmas condicións que os adultos. É dicir, no caso dos menores de 14 a 17 anos, o Goberno aclarou que, se teñen autonomía e permiso paterno, poderán acollerse aos supostos que xa contempla o decreto de alarma, no que se inclúen as saídas por motivos esenciais, como saír para realizar compras de primeira necesidade. A orde sinala que poderán saír tres menores como máximo con cada adulto que será responsable de cumprir as medidas de seguridade: distancia de seguridade de 1-2 metros e lavado de mans habitual.
A orde confirma que os paseos deben ser de 9 a 21 horas nun radio dun quilómetro de distancia do fogar, que poderá ser en parques, aínda que non en randeeiras “zonas recreativas e deportivas” e que a duración máxima será dunha hora.
