Protección Civil de Boiro comezou estes días o reparto de ordenadores
portátiles e conexión de acceso a internet, entrega de xeito temporal e mentres non se retomen as clases, ao alumnado dos centros do municipio que non dispoñe de recursos para continuar as tarefas de aprendizaxe na casa.
Co peche dos colexios, motivado pola pandemia do COVID-19, profesorado, alumnado e a administración veuse na obriga de buscar fórmulas para continuar coa formación a distancia. Non todas as persoas dispoñen dos
mesmos medios e recursos para a formación online por iso, ante estes cambios no sistema de aprendizaxe, a administración comezou a artellar fórmulas para garantir a continuidade da formación.
O primeiro que se fixo foi poñer en funcionamento un sistema de impresión de fotocopias para aqueles alumnos e alumnas que non dispoñen
dos medios para acceder desde os seus fogares. Unha vez por semana o
persoal municipal imprime e reparte as fotocopias a aquelas persoas que
indican os propios centros educativos.
Os operarios de Protección Civil comezaron tamén co reparto dos libros
que, debido á suspensión das clases, quedara nos centros educativos. Agora, os operarios comezaron co reparto de ordenadores portátiles e rúter para a conexión a internet ao alumnado que non dispón dos recursos necesarios para continuar coa formación a distancia, mentres dure o curso escolar, segundo os criterios e indicacións dos centros educativos para a súa asignación.
