As entidades e colectivos da comarca seguen adiante co seu importante labor solidario durante tempos tan complicados como este que estamos a que vivir, un Estado de Alarma que deixa ás persoas que viven en soidade máis soas que de costume e aos vulnerábeis máis vulnerábeis. Entre os primeiros colectivos en botar unha man atopáronse as voluntarias e voluntarios de Protección Civil da Pobra do Caramiñal, que informan que seguen adiante co seu labor de apoio a persoas con mobilidade reducida a través do seu grupo específico de intervención sociosanitaria.
Do que se trata, lembran, é de levarlles á casa alimentos, produtos de farmacia ou bens de primeira necesidade.
Están a poñer o foco en persoas que, por causa da idade, por estaren nunha situación de risco nesta etapa de alarma sanitaria polo coronavirus, ou por outros inconvenientes de falta de mobilidade, non sexan quen de facer as compras diarias con normalidade ou acceder a outros servizos.
O servizo funciona en horario de 9.00 a 13.00 horas, ea través do número de teléfono 881 083 967. O Grupo de Atención Sociosanitaria tamén estará operativo a través do teléfono 636 485 078.
