Como medida para aliviar a presión sobre a xente do mar nestes tempos de restricións e parón económica, Portos de Galicia anunciou este luns 6 de marzo que vai flexibilizar o pago das taxas nos peiraos autonómicos. En concreto, ampliará até finais do mes o prazo voluntario de pago dos impostos que vencesen a partir do 18 de marzo, adiando a emisión de facturas por taxas portuarias até dous meses despois de que remate o Estado de Alarma. Polo tanto, o abono dos pagamentos poderá realizarse até o vindeiro 30 de abril.
Portos de Galicia tamén acordou adiar ata dous meses despois de que remate o Estado de Alarma a emisión de novas facturas por taxas, decisión que ten como obxectivo “aliviar posíbeis tensións de tesourería ás entidades e empresas usuarias dos portos e favorecer a existencia de liquidez para que poidan manter a súa actividade unha vez superada esta situación excepcional pola alerta sanitaria”. A maiores, os contribuíntes poderán beneficiarse dos adiamentos e fraccionamentos habituais previstos tanto na lei xeral tributaria coma nos regulamentos de recadación en vigor na comunidade.
Estas medidas foron comunicadas este luns pola conselleira de Mar, Rosa Quintana, á Federación Galega de Confrarías de Pescadores e á Asociación Galega de Depuradores de Moluscos (AGADE). A iniciativa afecta a servizos especiais como a entrada ou estadía de barcos nos peiraos galegos, a atracada, o tráfico de mercadorías e pasaxeiros, de produtos do mar ou o tránsito de embarcacións deportivas ou de lecer.
Tamén abrangue outros servizos específicos como guindastres, almacenaxe, locais e edificios, fornecementos ou servizos diversos, así como as taxas portuarias polo exercicio de actividades comerciais, industriais e de servizos.
