Malia a crise sanitaria e as medidas excepcionais do Estado de Alarma, o Goberno galego anunciou hoxe que manterá activos os labores de restauración e conservación de hábitats de interese nos seis parques naturais existentes na Comunidade, así como no Parque Nacional marítimo-terrestre das Illas Atlánticas de Galicia. O obxectivo destes traballos, co-financiados polo Fondo Europeo de Desenvolvemento Rexional (FEDER) nun 80%, é “preservar a biodiversidade e os valores naturais” destes espazos, ao tempo que se dotan de protección fronte aos lumes forestais. Os traballos abranguen o Parque Natural de Corrubedo e o arquipélago de Sálvora (Parque Nacional das Illas Atlánticas). No caso do noso parque natural, os labores prolongaranse até o novembro, logo de que comezasen o pasado 3 de marzo.
A Xunta tamén informou que foi preciso adaptar os procesos de protección, restauración e adecuación á nova realidade marcada polo COVID-19 e a pandemia. En concreto, a empresa pública SEAGA, encargada do servizo, tivo que interromper temporalmente os traballos para acondicionar o sistema do transporte ás medidas de seguridade esixidas polo Decreto de Alarma, retomando a actividade días despois.
Os traballos a realizar inclúen sobre todo o acondicionamento dos hábitats con moto-rozadoras naquelas áreas onde non é posíbel o emprego de maquinaria, e o acondicionamento mecanizado con tractor en superficies con diferentes pendentes e tamén en marxes de camiños.
Ademais, a encomenda inclúe a realización doutras tarefas como: limpeza de gabias con retro-escavadora ou moto-niveladora, co fin de evitar danos nos habitas por desbordamento; acondicionamento da rede de drenaxe existente; recollida, clasificación e acopio de residuos, así como limpeza manual en praias; apertura manual de faixas-devesas; podas e clareos en masas arbóreas existentes para manter a luminosidade dos hábitats en cobertura; ou eliminación de especies alóctonas, “co fin de restaurar hábitats degradados”.