Os empresarios de Boiro, Rianxo e Noia poñen a súa experiencia a disposición da Xunta para loitar contra a crise

15 Abril 2020
Typing on laptop closeup, chatting in Facebook, meeting website. Blogger, journalist writing new article.

As asociacións de empresarios de Boiro, Rianxo e Noia (ABE, ARE e Noia Histórica) veñen de asinar un comunicado conxunto no que mostran a súa total dispoñibilidade para traballar neste momento de crise sanitaria nas medidas autonómicas de reactivación impulsadas pola Consellería de Economía. O comunicado, emitido tamén polas restantes entidades da Asociación Galega de Centros Comerciais Abertos (CCAS de Galicia), é unha mensaxe de apoio e de unidade a prol do traballo conxunto entre os comerciantes e a Xunta para “vencer ao COVID-19 e saírmos adiante reforzados e máis unidos ca nunca”.

40 xerencias

A entidade de ámbito autonómico está formada por máis de 40 xerencias dos Centros Comerciais Abertos e nestes momento representan a máis de 5.000 establecementos e empresas. As xerencias salientan no comunicado o seu papel de “dinamizadoras do comercio local” e o seu gran potencial para “aplicar políticas de axudas comerciais promovidas pola Administración”. Neste punto, destacan positivamente a súa participación na REDIC, un instrumento mediante o cal a Xunta de Galicia está a impulsar o proceso de modernización e ordenación do comercio local.

Puntos concretos

A asociación, “consciente das necesidades de apoio e acompañamento que xurdirán para o comercio de proximidade unha vez que finalice o Estado de Alarma”, propón os seguintes puntos:

· Poñer todas as unidades xerencias dos CCA, directivas e demais persoal técnico, así como “a nosa experiencia e vontade de traballo”, a disposición da Consellería de Economía, Emprego e Industria, da Dirección Xeral de Comercio en particular, co fin de “dar resposta ás inquedanzas e suxestións do tecido comercial das nosas vilas”.

· Incluír aos representantes de AGAXECCA nos debates ou mesas de traballo que teñan lugar no ámbito da Dirección Xeral de Comercio e “vencellar esta entidade ás decisións que poidan afectar ao sector ao que representamos”.

Comisión de traballo

As integrantes da asociación, considerando “a necesidade de ser máis áxiles e operativas”, construíron unha comisión de traballo, avalada pola totalidade das asociacións e constituída por un xerente de cada provincia, que representará os intereses dos Centros Comerciais Abertos coma puntos da rede de dinamización comercial da Xunta de Galicia. As ditas persoas son:

– Provincia de A Coruña: María del Carmen Fernández Dopico – Centro Comercial Aberto Ferrol – A Magadalena.

– Provincia de Lugo: Ángel Folgueira Álvarez – Centro Comercial Urbano Monforte.

– Provincia de Ourense: Lorena Tato Rodríguez – Centro Comercial Aberto Ourense Centro.

– Provincia de Pontevedra: Yonathan Carreira Figueiras – Centro Comercial Aberto Estrela de Marín.

Outros artigos

Publicidade

Revista en papel

Opinión

“A vivenda” – José Manuel Pena

“A vivenda” – José Manuel Pena

É un ben de mercado para o negocio particular ou un dereito básico, fundamental e humano, como pode ser a educación, a sanidade, a prestación por desemprego ou a xubilación? A vivenda, en Galicia e no resto de España, continúa sendo un negocio e un ben de...