Contra vento e marea, e aproveitando as posibilidades que ofrecen as redes sociais e as novas tecnoloxías en xeral para superar confinamentos e pandemias, o Festival Audiovisual Escolar Olloboi chega á súa décima edición, ampliando horizontes e prazos para a presentación de contribucións (debido aos condicionantes do Estado de Alarma que, por certo, centran unha das categorías do certame 2020: a modalidade Olloboi COVIDeo doméstico). A nova convocatoria do certame boirense está novamente dirixida a todos os niveis educativos (Infantil, Primaria, Secundaria, Bacharelato, Formación Profesional, Universidade, Escolas Audiovisuais), aceptándose videocreacións (ficción ou documental) de duración preferentemente non superior ós 20 minutos. A edición 2020 celebrarase co inicio do vindeiro curso.
Establécense as seguintes categorías:
Olloboi Peque: para traballos elaborados con alumnado de Infantil e Primaria.
Olloboi Plus18: para pezas elaboradas por alumnado de centros de ensino superior (escolas universitarias, ciclos de formación profesional superior, EOI, etc.) ou profesorado.
Olloboi Xubiloi: para traballos de profesorado xubilado.
Olloboi Xeral, onde participan todas as pezas presentadas de acordo cos seguintes epígrafes:
– Olloboi Interpretación: onde se valorará unha boa dirección de actores e/ou un reparto ben escollido, evidenciándose na naturalidade ou adecuación das interpretacións
– Olloboi Imaxe: o que amose unha edición mellor planificada, un emprego consciente das leis de composición visual, a escolla da paleta cromática, tratamento da luz, etc.
– Olloboi DJ: a mellor sonorización e/ou interpretación musical, orixinal ou versión.
– Olloboi Guión: o mellor texto orixinal, onde se primará a existencia de personaxes e situacións verosímiles. Terase en conta a comicidade.
– Olloboi Arte e Estética: onde se terá en conta a construción de escenarios, vestiario e maquillaxe. Terán especial cabida nesta categoría as animacións e o uso de técnicas stop motion, time lapse, etc.
– Olloboi Comprometido: unha categoría para reivindicar e defender o “que tantos anos custou lograr e que tan facilmente pode perderse”. Pola liberdade, polo rural, polas mulleres, pola cultura e polo ben público en xeral.
– Olloboi Zamburrioi: premio especial concedido pola Asociación Olloboi.
– Olloboi COVIDeo doméstico: Categoría que xorde directamente da problemática da pandemia e do confinamento que estamos a vivir, onde se convida a “reflexionar sobre esta situación e sobre o país que nos agarda á volta”. Segundo informan as organizadoras e organizadores de Olloboi poderá achegarse nesta modalidade unha peza de corte experimental e poético, con material actual ou de fondo de disco duro; documental, recollendo o diario da vida doméstica, de ficción ou animación. Terá que levar nos créditos o cancelo #OlloboiCOVIDeo. As contribucións optarán a un premio especial que consistirá en asistir a unha rodaxe de cine galego (datas a considerar en función da evolución do virus).
A inscrición de traballos deberá facerse en Olloboi.com.
