O Museo Municipal de Ribeira subirá ás redes catro vídeos sobre o naufraxio do Santa Isabel

Na sesión destes xoves 2 de abril da Comisión de Seguimento da Evolución do COVID-19 do Concello de Ribeira informouse dunha nova acción divulgativa concibida con vistas ao vindeiro centenario do afundimento do vapor Santa Isabel na illa de Sálvora (será o 2 de xaneiro do ano que vén). Trátase da elaboración por parte da Sala Museo Municipal de Ribeira de catro pequenos vídeos centrados nesta traxedia coa fin de compartilos tanto nas redes sociais como na programación municipal en Canal Barbanza.

Segundo fixo saber o Concello de Ribeira, os vídeos combinan imaxes de época con outras extraídas dos fondos que acubilla o museo e que teñen relación co naufraxio. O primeiro versa sobre o afundimento do vapor, o segundo sobre as Heroínas de Sálvora, o terceiro sobre Luis Cebreiro e o cuarto sobre o libro recompilatorio que este oficial realizou e foi cedido pola familia ao noso museo no 2018. A intención do Concello é comezar a difundir os contidos esta fin de semana.