Con motivo do Día do Libro, este 23 de abril, o Goberno galego está a repartir nos hospitais da nosa terra un importante lote de obras para mitigar, con literatura e lecer, as estadías dos pacientes, os acompañantes e o persoal dos centros sanitarios, un total de 14 hospitais públicos entre os que se atopa o Hospital do Barbanza. A iniciativa levarase a cabo a partir deste xoves e durante as vindeiras xornadas. Poranse en circulación 4.000 libros galegos e farase fincapé na súa importancia para a nosa cultura, a nosa economía, o noso progreso e, agora máis ca nunca, para mellora na medida do posíbel as estadías nos fogares e nos hospitais de millóns de persoas.
Son libros procedentes das adquisicións da Consellería de Cultura e Turismo a editoras para o seu agasallo xeral e uso nas aulas hospitalarias.
A remesa está configurada de xeito maioritario por obras de literatura infantil e xuvenil en galego, e inclúe unha escolma de títulos para aproximarse ao patrimonio cultural e, especificamente, ao Camiño de Santiago, con volumes como A peregrina gastrónoma, escrita por María Canosa; pero, no seu conxunto procura cubrir a diversidade de gustos e temáticas lectoras, incluíndose títulos clásicos, obras arredor do persoeiro ao que se lle dedica este ano o Día das Letras Galega, Ricardo Carvalho Calero, ou monografías de sabios do país como Astronomía. A ollo ceibe de Ramón María Aller.
Os centros nos que se realizará son o Hospital Público do Barbanza, o Complexo Hospitalario Universitario de Pontevedra, o Hospital Público Virxe da Xunqueira, o Complexo Hospitalario Universitario de Santiago, o Complexo Hospitalario Universitario de Ferrol, o Complexo Hospitalario Universitario da Coruña, o Hospital Público de Valdeorras, o Hospital Público de Verín, Hospital Público de Monforte, o Complexo Hospitalario Universitario de Ourense, o Complexo Hospitalario Universitario de Lugo, o Hospital Público da Mariña, o Hospital Público do Salnés e o Complexo Hospitalario Universitario de Vigo.
