O Concello de Boiro recibiu unha doazón de material para a elaboración de
mascarillas de protección por parte de Jealsa a través da empresa Jealfer. Un grupo de costureiras voluntarias vai comezar a confeccionar un total de 25.000 mascarillas para distribuír entre a cidadanía previr contaxios polo virus COVID- 19.
Os operarios de Protección Civil recolleron o envío de tela doada por Jealsa para a elaboración de mascarillas, e comezaron o reparto entre un grupo dunhas 50 persoas voluntarias que, nas súas casas, as confeccionan.
Está previsto que nas vindeiras semanas se realicen un total de 25.000
unidades, que se van destinar para distribuír á poboación xeral máis exposta ao virus.
A tela, xa cortada, vaise repartir entre as 50 costureiras voluntarias que se organizaron para a elaboración de mascarillas, debido á ausencia delas nas
farmacias para a poboación xeral. As persoas voluntarias son, na súa maioría, de Boiro, pero tamén hai algunhas de Pobra e Rianxo, e xa confeccionaron e realizaron un envío de mascarillas para o persoal do Hospital do Barbanza.
O Concello de Boiro recibe envíos puntuais de material de protección da
Xunta de Galicia e a Deputación da Coruña para persoal que traballa en
limpeza, atención a persoas… e que están máis expostos aos contaxios. As
mascarillas confeccionadas por este grupo de costureiras voluntarias vanse
destinar para distribuír entre a poboación xeral.
