O Concello de Boiro adhírese á reivindicación do comercio local do Maio Vintage (este 2 de maio en versión online)

O Maio Vintage de Boiro, o festival-mercadiño do comercio de “toda a vida”, ía ser este ano unha realidade si ou si, entre outras cousas porque o espírito que alenta o acontecemento, esa defensa radical do consumo e a cultura de proximidade, semella ser un espírito invencíbel a proba de pandemias. Asumido o reto de realizar a nova edición en formato virtual, este 2 de maio, a organización (a asociación Creaturas) foi recibindo apoios de xeito continuo dende o intre en que se confirmou a convocatoria online. Por exemplo o apoio do departamento de Cultura do Concello de Boiro, que confirmou a súa colaboración na versión máis dixital deste festexo da cultura e o comercio local e, tamén, nas vindeiras edicións.

O Concello confírmanos que a asociación cultural Creaturas ten programada “unha xornada completa con contidos para todos os gustos”. Deste xeito, Nelson Quinteiro colgará nas redes un contacontos para nenos e nenas, Deica creacións vai facer un directo en Instagram sobre o deseño gráfico e Charlatana cooperativa galega vai poñer a disposición de todas as persoas interesadas os seus vídeos de Charlatana na casa.

Amais, as produtoras locais Diane Onloocker, María Magán e Píkara van facer obradoiros online e a asociación Ambar, de persoas con capacidades diferentes, colgará nas súas redes unha performance. Tamén haberá música a través das pantallas, con Chamaquito Pistolas, Doutor Migraña e Swing Compostela.