Desde o departamento de Medio Ambiente do Concello de Boiro alertase
á poboación da importancia de manter os bos hábitos na reciclaxe durante o confinamento xa que, desde que comezou o Estado de alarma, aumentou de xeito considerable o número de residuos e tamén a cantidade de impropios que se depositan no contedor xenérico.
No ano 2018, gracias á recollida selectiva que realizan os veciños e
veciñas, a taxa de residuos baixou, algo que repercute directamente na factura que pagan os contribuíntes. Sogama premia aos municipios que fan unha boa labor na recollida de residuo e penaliza a aqueles que aumentan notoriamente a cantidade de residuos, sobre todo de impropios, no contedor xenérico.
Desde que comezou o Estado de alarma, os operarios encargados da
recollida do lixo detectaron que se aumentou de xeito significativo a cantidade de impropios que se depositan ao contedor xenérico. Roupa, aparellos eléctricos e enseres de todo tipo son algúns dos elementos que se están detectando no contedor xenérico e que teñen unha segunda vida.
O departamento de Medio Ambiente insiste na importancia de depositar
os residuos que son reciclable nos contedores axeitados, como son os envases lixeiros, o papel e cartón, o vidro, os aceites, a roupa… Os restos de podas e outros residuos agrícolas non se deben depositar no contedor xenérico, senón que hai que agardar a que se poidan facer queimas. As máscaras, luvas, gafas e outros materiais de seguridade non se poden depositar no contedor amarelo, teñen que ir ao xenérico.
