A sesión deste luns 27 de abril da Comisión de Seguimento da Evolución da COVID-19 foi, novamente, un importante parte informativo sobre as accións levadas a cabo en Ribeira, e por levar, para pór freo ao avance da pandemia e protexer á poboación. Segundo se fixo saber, este mesmo luns chegaron a Ribeira as 15.000 máscaras que tiña programado enviar a empresa local FRINSA para incrementar a protección contra a pandemia no concello.
Trátase, en palabras do equipo da Comisión, “dunha notábel contribución de cara á última fase do reparto domiciliario deste material entre toda a poboación do municipio”. Amais de agradecer a doazón de FRINSA, na sesión tamén se enxalzou a solidariedade da empresa ABC Boiro polo subministro de 50 pantallas de protección individual.
No que se refire á situación do reparto nos fogares, informouse de que tras o remate (esta fin de semana) da distribución de elementos de protección na parroquia de Palmeira, o Concello afronta agora as súas dúas últimas parroquias, que son a súa vez as máis populosas: Aguiño e Santa Uxía, na que se comezará polos seus núcleos periféricos antes de afrontar o casco da cidade.
No capítulo de denuncias por vulnerar o confinamento, tramitouse unha máis cinco actas de requirimento.
Arcos de control de temperatura e desinfección
Para rematar, fíxose saber que no marco do plan local de desescalada, a Comisión deu luz verde ao encargo de tres arcos de control de temperatura e desinfección que serán colocados na entrada de diversas dependencias de titularidade municipal.
