O Goberno galego, a través da Consellería do Mar, repartirá 10.000 máscaras de protección fronte ao COVID-19 nas lonxas dos peiraos de titularidade autonómica. O persoal encargado da distribución do material en máis de trinta rulas da nosa terra serán os axentes do Servizo de Gardacostas de Galicia. O reparto realízase en base ao volume de actividade de cada lonxa e tendo en conta que, en palabras de Mar e do Goberno central, “trátase dun ámbito esencial para o abastecemento de alimentos de calidade á cidadanía”. As máscaras chegarán ás rulas de Ribeira, Porto do Son, Rianxo e Aguiño.
A Administración galega pretende contribuír a que “o persoal destas instalacións conte con mellores medios para desenvolver o seu labor en condicións de seguridade e previr así posíbeis contaxios”.
Estes elementos de protección individual foron entregados polo Executivo galego ao Servizo de Gardacostas de Galicia, dependente da Consellería do Mar, que está a preparar os distintos lotes e que se encargará do seu envío a aquelas lonxas que manteñen a súa actividade.
Na provincia da Coruña as lonxas que seguen operativas e que recibirán este material son as de Ribeira, Cedeira, Portosín, Camariñas, Malpica, Porto do Son, Laxe, Muxía, Fisterra, Rianxo, Corcubión, Aguiño, Ferrol, Carnota, Cariño, Camelle, Barallobre e Espasante. No caso de Lugo son dúas, as de Burela e Celeiro, e na provincia de Pontevedra as de Portonovo, Cambados, O Grove, A Illa de Arousa, Bueu, Cangas, Vilanova de Arousa, A Guarda, Redondela, Campelo, Moaña, Carril e a Cooperativa Ría de Arousa.
