O Goberno galego, ao abeiro da súa campaña de lecer e formación #aculturasegue, vén de activar nas redes sociais e máis na web da Cidade da Cultura un curso formativo para axudarnos a mellorar, con diversas técnicas e dende as oportunidades de formación que nos ofrece o confinamento, a nosa habilidade coas fotografías que facemos co móbil. O curso en liña Clic Xanela foi concibido para un público adulto sen necesidade de coñecementos previos sobre fotografía dixital.
Cada semana, o fotógrafo Óscar Corral compartirá nas redes sociais e na páxina web da Cidade da Cultura técnicas que facilitarán “de xeito sinxelo e a calquera tipo de usuario” realizar mellores fotografías instando a levalas a cabo desde as xanelas das e dos participantes.
Entre os consellos, os participantes atoparán desde os máis básicos de iniciación até ao dominio da luz, a harmonía cromática, a composición e disposición dos elementos a fotografar ata chegar a contidos máis elaborados sobre o discurso que podemos inxerir nunha imaxe, aínda que sexa feita desde o móbil e a través da fiestra.
Todas a persoas que participen poden compartir as súas fotografías tras aplicar o consello práctico tanto polas redes sociais da Cidade da Cultura, como facéndoas chegar ao enderezo electrónico onlinecidadedacultura@gmail.com para un grande álbum en liña compartido.