A Xunta inicia a partir de hoxe o reparto de equipos de protección entre os concellos galegos en colaboración coa Federación Galega de Municipios e Provincias (FEGAMP). Así o anunciou hoxe o vicepresidente da Xunta, Alfonso Rueda, tras unha videoconferencia cos delegados territoriais para coordinar a acción da Administración autonómica ante a epidemia do coronavirus.
A medida, acordada en conversas coa FEGAMP, vai destinada, principalmente, aos concellos máis pequenos que necesitan eses medios e non teñen outra forma de adquirilos. Distribuiranse, nun primeiro envío, 15.000 mascarillas e 100.000 pares de luvas. Neste senso, o vicepresidente explicou que “estou seguro de que será unha axuda importante para que tamén desde os servizos que ofrecen os concellos poidan seguir traballando e protexendo aos funcionarios municipais nas tarefas esenciais que tamén desenvolven.”
Así mesmo, Rueda puxo de manifesto que mañá comezan os traballos das brigadas da Consellería do Medio Rural para dedicarse, tamén nos concellos máis pequenos, a tarefas de desinfección de exteriores de centros sanitarios, residencias e centros sociosanitarios.
