Os sindicatos UGT e CIG veñen de convocar folga na empresa estibadora Consignaciones Barbanza SL, a cal se iniciará o luns 9 con carácter indefinido nunha primeira instancia e de forma parcial con paros de dúas horas diarias.
Desde os sindicatos manifestan que as principais reivindicacións “xorden da falta de acordo legal das relacións laborais, que si están reguladas mediante convenio colectivo nas outras dúas empresas que operan nos peiraos de A Pobra e Ribeira. As melloras nas condicións laborais, sobre todo salariais, de organización do traballo e en materia de prevención de riscos laborais son o eixo do convenio colectivo que se reivindica pola parte social.”
A folga afectará indirectamente a empresas transportistas e industria conserveira, segundo sosteñen, “posto que se verá comprometido a subministración regular de túnidos a granel.”
Afectará tamén ás empresas consignatarias de buques e navieiras nos traballos de desestiba e a Portos de Galicia, xa que os centros de traballo afectados teñen as instalacións emprazadas nos peiraos de Ribeira e A Pobra.
Finalmente, sinalan que a comunicación formal foi realizada á empresa este martes, así como ás Administracións públicas afectadas: Consellería de Economía, Emprego e Industria; Consellería do Mar; Portos de Galicia; e Subdelegación do Goberno en A Coruña.
