A xunta directiva da Asociación de Empresarios de Ribeira vén de emitir un comunicado expresando o seu malestar pola información recentemente publicada na cal se daba a coñecer a vontade da patronal de apoiar a construción dun aparcamento subterráneo baixo o futuro Auditorio Municipal. A asociación sinala que as referencias á entidade na dita información, achegada este 4 de marzo, resultan erróneas, ao responsabilizar á entidade duns datos “que nós non temos trasladado directamente”, sinala no comunicado, engadindo que a patronal ribeirense é unha asociación sen ánimo de lucro “totalmente independente” e que carece de “vencellos políticos”, polo que “mantemos totalmente á marxe das disputas das diferentes formacións políticas municipais”.
Na carta de aclaración, os empresarios ribeirenses sosteñen que a súa posta é que se habilite un estacionamento nas inmediacións do novo Auditorio, “xa que a nosa primeira opción é inviable segundo os técnicos do Concello”. E engaden: “Só perseguimos o que cremos mellor para os intereses dos nosos socios e da nosa cidade, pero non queremos que as nosas accións e manifestacións sexan manipuladas para acadar ningún fin político”.
