Baixo o título Santiago de Compostela: Rosa mística de pedra, a capital galega foi escenario o xoves 5 dunha ruta literaria de Ramón del Valle-Inclán. Trátase dunha iniciativa promovida polo Museo Valle-Inclán, o Ateneo de Santiago e a A. C. Amigos de Valle-Inclán, sumándose nesta ocasión a Fundación Eugenio Granell e a Asociación Cultural San Martín Pinario.
A cita contou coa participación dun grupo de 80 persoas, guiándose polos comentarios de Antonio González Millán, director do Museo Valle-Inclán da Pobra do Caramiñal; Pilar Sampedro, do Ateneo; e Xaquín del Valle-Inclán Alsina, presidente da A. C. Amigos de Valle-Inclán; e animáronse a ler a escolma de textos do escritor inspirados nos espazos urbanos, monumentos e tipos humanos característicos da cidade.
As persoas asistentes recibiron como obsequio unha publicación deste roteiro, en versións galega e castelá, edición de Incolsa-Turismo de Santiago, que reproduce cartografía, citas literarias e imaxes do intelectual en Compostela.
