O Servizo Galego de Saúde e os hospitais privados de Galicia van funcionar como un sistema único e integral, en cumprimento do disposto polas medidas adoptadas polo Ministerio de Sanidade. Deste xeito, o Goberno galego manifesta que prosegue coa coordinación con diferentes axentes para establecer actuacións centradas na prevención para conter o contaxio do COVID-19.
Neste senso, o conselleiro de Sanidade, Jesús Vázquez Almuiña, mantivo unha vídeo conferencia cos responsables dos centros privados galegos para informarlles das medidas concretas que se porán en marcha para a coordinación integral da asistencia sanitaria entre hospitais públicos e privados.
Así mesmo, o conselleiro destacou que se estableceu contacto con tódalas empresas de ambulancias de Galicia para elaborar un censo e establecer a coordinación necesaria que permita mobilizar os vehículos en caso de necesidade.
Durante a xuntanza, Almuiña apuntou que a Xunta continúa mantendo o contacto con tódolos axentes socioeconómicos de Galicia, en alerta e cunha vixilancia permanente para actualizar tódalas medidas de recomendacións.
Ademais, afirmou que a Administración autonómica segue traballando desde a máxima coordinación tanto interdepartamental coma co Ministerio de Sanidade.
