O IES Praia Barraña, xunto co Concello de Boiro, a Asociación Cultural Barbantia e A Pousada da Galiza Imaxinaria organizan o I Premio Barraña Negra. Ao acto de presentación asistiron a concelleira de Cultura e Educación, María Outeiral; o director do IES Praia Barraña, Juan Carlos Couto Vázquez; o mestre de debuxo do instituto, Fran Blanco Alcaide; o presidente de A. C. Barbantia, Manuel Cartea; e o xerente de A Pousada da Galiza Imaxinaria, Suso Santamaría.
Dita convocatoria ten un dobre obxectivo: fomentar a lectura no alumnado, xa que no centro se están a ler novelas deste xénero; e dar a coñecer entre o alumnado e público en xeral a autoría galega do xénero negro. O xurado deste premio serán membros do Club de Lectura da Biblioteca do IES Praia Barraña, composto por alumnado e profesorado do centro, que comunicará no transcurso do mes de marzo a resolución deste recoñecemento.
Unha vez se coñeza ao gañador ou gañadora, os estudantes traballarán nas aulas en torno a súa figura e obra a través de diversas disciplinas. O premio consiste nunha escultura elaborada polo alumnado de artes e un xantar de confraternidade que coincidirá coa entrega da distinción o 17 de abril. A celebración comprenderá un encontro no centro educativo e un acto público en A Pousada da Galiza Imaxinaria, no que a persoa premiada recollerá o galardón, concluíndo a xornada cun concerto de O Sonoro Maxín.
