O delegado do Goberno en Galicia, Javier Losada, analizou cos mandos policiais das cidades galegas as principais prioridades para reforzar a seguridade e consolidar a Galicia como unha das comunidades autónomas máis seguras do Estado. Expresouse así durante unha visita realizada á Xefatura Superior de Policía de Galicia tras a toma de posesión do seu novo titular, José Luis Balseiro. Na reunión valorou algúns dos principais proxectos en marcha da Policía Nacional en Galicia, como é a construción da comisaría de Ribeira; á vez que repasou as principais estatísticas en materia de seguridade.
Javier Losada visitou as instalacións da Xefatura Superior de Policía da Coruña, acompañado pola subdelegada na Coruña, Pilar López- Rioboo, tras a recente toma de posesión de José Luis Balseiro, e mantivo un encontro de traballo de coordinación cos mandos policiais galegos. Entre os obxectivos fundamentais establecidos figura a loita contra a violencia machista, combater o crime vinculado ás novas tecnoloxías, acabar coa delincuencia organizada e perseguir o narcotráfico.
