O Concello da Pobra continúa achegando propostas para paliar as consecuencias do confinamento, facendo un esforzo especial no lecer das nenas e nenos, que se atopan entre os que levan a peor parte do estado de alarma e da reclusión forzosa. Este luns 30 de marzo presentáronse as actividades do programa Móvete na Casa, que, como o seu nome indica, diríxese a subministrar ás familias recursos para que os seus integrantes sigan activos e combatan deste xeito a imposibilidade de saíren da casa.
As monitoras de Móvete na Casa publicaron hoxe un vídeo de saúda, dando a coñecer o seu obxectivo de “xuntarse” e “facer fronte a situación do estado de alarma” e que as familias poidan pasar “un anaquiño de tempo entretido na nosa compañía”.
Segundo indicaron, ao vídeo publicado este luns sumaranse este martes as primeiras actividades, “unha chea de aventuras para as pequenas e pequenos”.
Podemos ver máis información sobre a iniciativa en Instagram e máis no Facebook, onde se van ir publicando diariamente os audiovisuais de Móvete na Casa. Tamén teñen canle propia en YouTube.
